ដំបូងលឺថារកាំរកូសមិនសូវចុះសម្រុង តែឥឡូវ Garnacho ទម្លាយថាខ្លួនបានស្តាប់ទៅតាមការទូន្មានប្រៀនប្រដៅពី Messi ទៅវិញ

គ្រាប់ពេជ្រកំពុងឆ្នៃរបស់អាហ្សង់ទីន ពោលគឺកីឡាករ Alejandro Garnacho បានចេញមកទម្លាយថា ការផ្លាស់ប្តូរទៅលេងអោយតោខៀវ Chelsea មិនមែនជារឿងដែលគាត់សម្រេចចិត្តតែឯងនោះឡើយ ដោយខ្លួនបានស្តាប់តាមកីឡាករជើងចាស់មួយរូបនេះ។

កាលពីមួយរយះមុន មានពាក្យចចាមអារ៉ាមជាច្រើនបានលេចឡើងថា ទំនាក់ទំនងរវាង Garnacho និង Lionel Messi រាងមានភាពរញ៉េរញ៉ៃបន្តិច ដោយសារតែ Garnacho មានការគោរពស្រឡាញ់ចំពោះ Cristiano Ronaldo ទាំងដែលខ្លួនជាជនជាតិអាហ្សង់ទីន។ យ៉ាងណាក្តី ថ្មីៗនេះ Garnacho បានចេញមកពន្យល់ពីមូលហេតុចំបងមួយដែលធ្វើអោយខ្លួនចាកចេញពី Manchester United ទៅកាន់កីឡដ្ឋាន Stamford Bridge។

ខ្សែប្រយុទ្ធស្លាបវ័យ 21 ឆ្នាំរូបនេះបានប្រាប់អោយដឹងក្នុងបទសម្ភាសន៍មួយថា មុនពេលដែលខ្លួនសម្រេចទៅលេងអោយ Chelsea រូបគេបានទៅសួរយោបល់ពី Lionel Messi ហើយជាលទ្ធផល ម្ចាស់ពាន Ballon d'Or 8 សម័យ បានណែនាំអោយសិស្សប្អូនរបស់ខ្លួនបន្តអាជីពជាមួយក្រុមតោខៀវ ដែលជាក្លិបអង់គ្លេសតែមួយគត់ចុច follow នៅក្នុងបណ្តាញសង្គម Instagram ទោះមិនធ្លាប់លេងអោយក៏ដោយ៕