មិនមែនសុខៗចេះតែកើតឡើងទេ! មុនឆក់ពី Spur តាមពិតទៅ Mikel Arteta ស្កាត់ជួប Eze មួយខែមុនបាត់ហើយ

គ្រូបង្វឹកក្រុមកាំភ្លើងធំ Arsenal លោក Mikel Arteta ត្រូវបានគេរាយការណ៍ថា បានលួចស្កាត់ជួបខ្សែបម្រើប្រយុទ្ធ Eberechi Eze តាំងពីខែមុនមកម្ល៉េះ មុនពេល Arsenal ឆក់យករូបគេចេញពីដៃរបស់ Tottenham Hotspur។

ប្រភពនៅអង់គ្លេសជាច្រើនបានចុះផ្សាយកាលពីពេលថ្មីៗនេះថា មុនពេលក្លិប Arsenal សម្រេចលូកដៃចូលក្នុងកិច្ចចរចារវាង Tottenham និង Crystal Palace សម្រាប់ហត្ថលេខារបស់ Eze តាមពិតទៅ ភាគីកីឡាករបានស្កាត់ជួបពិភាក្សាក្រៅផ្លូវការជាមួយលោក Mikel Arteta ម្តងរួចទៅហើយ កាលពីពាក់កណ្តាលខែកក្កដាកន្លងទៅ។

ប្រភពដដែលក៏បានបន្ថែមទៀតផងដែរថា Eze មានទំនុកចិត្តជាខ្លាំងចំពោះគម្រោងដែល Arteta បានលើកយកមកនិយាយក្នុងជំនួបមួយនោះ តែត្រូវរក្សាការសម្ងាត់សិន ព្រោះក្លិបទើបតែជះលុយ 63 លានផោន​ ទិញយក Viktor Gyokeres ពី Sporting Lisbon។ ពេលនេះ  Arsenal នៅសល់តែមួយជំហានទៀតប៉ុណ្ណោះ ដើម្បីនាំយក Eze មកកាន់កីឡដ្ឋាន Emirates ជាមួយកញ្ចប់ទឹកប្រាក់ប្រមាណ 68 លានផោន ដោយមិនរាប់បញ្ចូលជាមួយលក្ខខណ្ឌផ្សេងៗ៕