យកបាន Modric គឺជារឿងល្អពេញទីហើយ តែអតីតគ្រូបង្វឹករូបនេះថាដំណើរឆ្ពោះទៅការលើកពានរបស់ AC Milan នៅឆ្ងាយដាច់កន្ទុយភ្នែកនៅឡើយ
អតីតអ្នកចាត់ការលោក Fabio Capello បានកោតសរសើរថា វត្តមានរបស់ខ្សែបម្រើ Luka Modric នឹងក្លាយជាពន្លឺជួយអោយក្លិប AC Milan កាន់តែចែងចាំង ប៉ុន្តែការប្រជែងដណ្តើមពានលីគកំពូលអ៊ីតាលី នៅតែជារឿងដែលពិបាកសម្រេចមួយដដែល។
អតីតគ្រូបង្វឹកក្រុម AC Milan នឹងក្រុមជម្រើសជាតិអង់គ្លេសរូបនេះ បានបង្ហាញពីការសាទរយ៉ាងខ្លាំងចំពោះថ្នាក់ដឹកនាំរបស់ AC Milan ដែលអាចនាំយកខ្សែបម្រើ Luka Modric ពីក្លិប Real Madrid បាន ដោយកីឡាករសញ្ជាតិក្រូអាតរូបនេះត្រូវបានគេស្គាល់ថាជាកំពូលខ្សែបម្រើមួយរូប ដែលមានទាំងភាពវ័យឆ្លាត នឹងភាពជាអ្នកដឹកនាំមួយរូប។
យ៉ាងណាក្តី លោក Fabio Capello ក៏បានបញ្ចេញនូវការបារម្ភអំពីដំណើរឆ្ពោះទៅការរកជើងឯកលីគកំពូលអ៊ីតាលី ព្រោះគាត់មើលឃើញថាក្រុម AC Milan នៅមានចំណុចខ្សោយក្នុងតំបន់សំខាន់ៗជាច្រើន ជាពិសេសនៅក្នងតំបន់ប្រយុទ្ធ ដែលកើតចេញដោយសារតែកង្វះធនធានក្នុងការនាំយកខ្សែប្រយុទ្ធមុតស្រួចផ្សេងៗនៅក្នុងទីផ្សារដោះដូរកីឡាកររដូវក្តៅនេះ៕
