សហភាពពលកម្មជាតិកម្ពុជា តំណាងកម្មករជាង ៧ម៉ឺននាក់ នឹងដាក់ញត្តិប្ដឹងទៅមហាអំណាច និងអង្គការអន្តរជាតិ ឱ្យស្វែងរកយុត្តិធម៌ជូនស្ត្រីពលករខ្មែរ ដែលត្រូវទាហានថៃចាប់រំលោភបូក
(ភ្នំពេញ)៖ សហភាពពលកម្មជាតិកម្ពុជា (NLC) ដែលមានសមាជិកសរុបជាង ៧ម៉ឺននាក់ នឹងដាក់ញត្តិទៅកាន់បណ្ដាស្ថានទូតមួយចំនួនប្រចាំកម្ពុជា ដើម្បីឱ្យជួយអន្តរាគមន៍ករណីកងទ័ពឈុតខ្មៅថៃចាប់រំលោភមកលើពលករស្ត្រីកម្ពុជា យ៉ាងសាហាវព្រៃផ្សៃជាទីបំផុត។ 
នៅព្រឹកថ្ងៃទី២១ ខែវិច្ឆិកា ឆ្នាំ២០២៥ ស្អែកនេះ លោក សំ សឿន ប្រធានសហភាពពលកម្មជាតិកម្ពុជា នឹងដាក់ញត្តិថ្កោលទោស ទាហានឈុតខ្មៅថៃ និងសុំកិច្ចអន្តរាគមន៍ទៅបណ្ដាស្ថានទូតមួយចំនួនប្រចាំកម្ពុជា ដូចជា៖ ស្ថានទូតអាមេរិក, សហភាពអឺរ៉ុប, ចិន, រុស្ស៊ី និងអង្គការ ILO-IOM-UN។ 
លោក សំ សឿន ប្រធានសហភាពពលកម្មជាតិកម្ពុជា មានប្រសាសន៍ថា ក្នុងនាមសហជីពតំណាងឱ្យកម្មករនិយោជិតនៅកម្ពុជា ពិតជាមិនទទួលយកបានទេនូវទង្វើដ៏អាក្រក់បំផុត សាហាវព្រៃផ្សៃ ឃោរឃៅ អមនុស្សធម៌ រំលោភបំពានសិទ្ធិមនុស្សយ៉ាងធ្ងន់ធ្ងររបស់ទាហានឈុតខ្មៅថៃ ដែលបានវាយធ្វើបាបពលករ និងរំលោភស្ត្រីជាពលករកម្ពុជាធ្វើការនៅប្រទេសថៃ។
