ប្រភពជាច្រើននៅប្រទេសអេស្ប៉ាញបានចុះផ្សាយថា ខ្សែការពារកណ្តាលរបស់អធិរាជស Real Madrid កីឡាករ Antonio Rudiger បានសម្រេចចិត្តថាផ្អាកការចរចាជុំវិញរឿងកុងត្រាថ្មីជាមួយក្លិប ចំពេលមានសំណើរធំៗជាច្រើនពីក្លិបទាំងក្នុង នឹងក្រៅទ្វីបអឺរ៉ុប។

សារព័ត៌មាន Marca ទើបតែបានចុះផ្សាយកាលពីពេលថ្មីៗនេះថា Real Madrid នឹង Rudiger បានយល់ព្រមគ្នាបណ្តោះអាសន្នក្នុងការផ្អាកការចរចាចំពោះការបន្តកុងត្រាថ្មីជាមួយក្លិប ចំពេលដែលខ្សែការពារអាឡឺម៉ង់រូបនេះនៅមិនទាន់ជាពីរបួសសាច់ដុំស្រួលបួលនៅឡើយ។ ប្រភពដដែលក៏បានបញ្ជាក់ផងដែរថា ភាគីទាំងសងខាង នឹងចាប់ផ្តើមគិតគូអំពីរឿងនេះ នៅពេល Rudiger ជាសះស្បើយឡើងវិញ ពោលគឺនៅក្នុងឆ្នាំ​ 2026 នេះ។

គួររំលឹកផងដែរថា Rudiger តែងតែត្រូវបានក្លិបចាត់ទុកថាជាចំណែកដ៏សំខាន់មួយក្នុងក្រុម ហើយកីឡាកររូបនេះគ្មានចេតនាក្នុងការចាកចេញពីទឹកដីប្រទេសអេស្ប៉ាញនោះឡើយ ប៉ុន្តែបើសិនជាការចរចាមិនសម្រេច រូបគេក៏មិនខ្វះខាតទីផ្សារនោះដែរ ដោយគិតមកទល់់ពេលនេះ អតីតក្លិបរបស់គេពោលគឺ Chelsea ក៏ដូចជាក្លិបមិនបញ្ជាក់អត្តសញ្ញាណមួយនៅអារ៉ាប៊ីសាអូឌីត សុទ្ធតែហ៊ានចាយលុយធំដើម្បីលួងលោមអោយខ្សែការពារវ័យ 32 ឆ្នាំនេះផ្លាស់ប្តូរក្លិបថ្មី៕