សម្តេចធិបតី ៖ ព័ត៌មានដែលល្អ និងមានអ្នកចូលចិត្តច្រើន គឺជាព័ត៌មានដែលប្លែក ពិត លឿន សុក្រឹត
សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានមានប្រសាសសន៍បញ្ជាក់ថា ព័ត៌មានដែលល្អ និងមានអ្នកចូលចិត្តច្រើន គឺជាព័ត៌មានដែល ប្លែក ពិត លឿន សុក្រឹត។ ព័ត៌មានប្លែក ពិត និងសុក្រិត្យ ពលរដ្ឋ នឹងបន្តតាមដាន និងជឿជាក់ ហើយឲ្យតម្លៃ ដូច្នេះហើយអ្នកសារព័ត៌មានទាំងអស់គប្បីត្រូវប្រកាន់ខ្ជាប់នូវ ក្រមសីលធម៌ និងវិជ្ជាជីវៈរបស់ខ្លួនឲ្យខាងតែបានកុំបំភ្លើស កុំបំភ្លៃ។ ការបញ្ជាក់នេះ ក្នុងឱកាសអញ្ជើញសំណេះសំណាល និងពិសារអាហារសាមគ្គី ជាមួយអ្នកសារព័ត៌មានលើកទី៧ដើម្បីអបអរសាទរទិវាសេរីភាពសារព័ត៌មាន នៅជ្រោយចង្វារ នារសៀលថ្ងៃទី៣ ខែឧសភា ឆ្នាំ២០២៥នេះ។ 
សម្តេចធិបតីក៏បានលើកទឹកចិត្តដល់អ្នកសារព័ត៌មានដែលបានផ្សព្វផ្សាយព័ត៌មានប្រកបដោយក្រមសីលធម៌វិជ្ជាជីវៈ ខណៈការផ្សព្វផ្សាយប្រកបដោយវិជ្ជាជីវៈនេះ បានជួយដល់រាជរដ្ឋាភិបាលក្នុងការប្រឆាំងព័ត៌មានក្លែងក្លាយ ដែលបង្កើតឡើងដោយក្រុមអ្នកនយោបាយប្រឆាំងមួយចំនួនក្តាប់តូចនោះ។ 
សម្តេចធិបតី បានចាត់ទុកអ្នកសារព័ត៌មាន គឺជាមែកធាងគ្រប់គ្រង របស់រដ្ឋ ហើយរាជរដ្ឋាភិបាលប្រកាសថានឹងគោរពឲ្យបានល្អបំផុតចំពោះសិទ្ធអ្នកសារព័ត៌មានស្របទៅតាមច្បាប់រដ្ឋធម្មនុញ្ញរបស់កម្ពុជា។
សម្តេចធិបតី ហ៊ុន ម៉ាណែត បានផ្តាំទៅក្រុមអ្នកសារព័ត៌មានមួយចំនួនកុំយកអាជីពអ្នកសារព័ត៌មានឯករាជ្យ ហើយទៅរំលោភបំពានសិទ្ធគេឲ្យសោះ គប្បីត្រូវគោរពគ្នាទៅវិញទៅមក ត្រូវ មានសុចរិតភាព និងត្រូវមានព្រំដែនឲ្យច្បាស់លាស់។
សម្តេចធិបតី ហ៊ុន ម៉ាណែត បានអំពាវនាវដល់អ្នកសារព័ត៌មានទាំងអស់កុំយកអាជីពអ្នកកាសែតទៅចុះផ្សាយនិយាយអាក្រក់ពីអ្នកដទៃ ដើម្បីតែផលប្រយោជន៍ខ្លួនឯងឲ្យសោះ ដោយត្រូវប្រកាន់ខ្ជាប់នូវសុក្រិតភាព និងក្រមសីលធម៌របស់អ្នកសារព័ត៌មាន។
